Xəbərlər

ETİHİ üzvləri Müəllimlərin XXII Yay İdman Oyunlarını 6 medalla başa vurublar

Bolqarıstanın Albena şəhərində keçirilən Müəllimlərin XXII Yay İdman Oyunlarına yekun vurulub.

Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirak etdiyi beynəlxalq yarışlarda Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqının (ETİHİ) təmsilçiləri uğurlu nəticələr əldə ediblər.

ETİHİ təmsilçiləri yarışları 4 birincilik və 2 üçüncülük olmaqla, ümumilikdə 6 mükafatla başa vurublar.

Mini-futbol üzrə komandamız final görüşündə Polşa təmsilçisini 5:4 hesabla məğlub edərək turnirin qalibi olub.

Stolüstü tennis üzrə komanda yarışlarında qadınlardan ibarət komandamız 1-ci, kişilərdən ibarət komandamız isə 3-cü yeri tutub.

Qadınlar arasında stolüstü tennis üzrə fərdi yarışda Nizami rayonu 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbinin məşqçi-müəllimi Rüfət Əliyeva 1-ci, Xətai rayonu 56 saylı tam orta məktəbin müəllimi Xəyalə Qiyasova isə 3-cü yeri tutub. Şahmat üzrə fərdi yarışda isə Şəmkir rayonu Kimya və Biologiya Təmayüllü Liseyinin müəllimi Bünyad Əsgərov 1-ci yerə layiq görülüb.

Sonda qaliblər Bolqarıstan Müəllimlər Birliyinin prezidenti Yanka Takeva, Bolqarıstan Müstəqil Həmkarlar İttifaqları Konfederasiyasının vitse-prezidenti Todor Kapitanov, Bolqarıstan İşçilərinin İdman və Sağlamlıq Federasiyasının prezidenti, Balkan İşçi İdmanı Assosiasiyasının vitse-prezidenti Desislava Yagodin və Varna şəhərinin meri Blagomir Kotsev tərəfindən kubok və medallarla təltif olunublar.

Beynəlxalq yarış təhsil işçiləri arasında sağlam həyat tərzinin təşviqində, eləcə də həmkarlar ittifaqı üzvləri arasında dostluq və əməkdaşlıq əlaqələrinin inkişafında mühüm rol oynayır.

Qeyd edək ki, 2004-cü ildən etibarən keçirilən bu yarışlarda Ümummilli Lider Heydər Əliyevin anadan olmasının ildönümünə həsr olunmuş respublika idman yarışlarında yüksək nəticələr göstərərək seçilmiş ittifaq üzvləri iştirak edirlər.

ETİHİ üzvləri Müəllimlərin XXII Yay İdman Oyunlarında uğurla çıxış edirlər

Bolqarıstanın Albena şəhərində Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirakı ilə Müəllimlərin XXII Yay İdman Oyunları keçirilir.

Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqının (ETİHİ) üzvləri də bu beynəlxalq yarışlarda iştirak edirlər.

Azərbaycan təmsilçiləri mini-futbol, stolüstü tennis, basketbol, çimərlik voleybolu və şahmat olmaqla 5 idman növündə mübarizə aparırlar.

Avqustun 27-28-də keçirilən yarışlarda ittifaq üzvlərimiz bir sıra uğurlu nəticələr əldə ediblər.

Mini-futbol üzrə komandamız qrup mərhələsini 6 xalla başa vuraraq yarımfinala yüksəlib. Yarımfinalda Bolqarıstanın “Vraça” komandasını 3:1 hesabı ilə məğlub edən təmsilçilərimiz finala vəsiqə qazanıblar.

Stolüstü tennis üzrə qadın və kişi komandalarımız da qrup mərhələsində keçirdikləri bütün qarşılaşmalarda qələbə qazanıblar. Qadınlardan ibarət komandamız 6 xalla, kişilərdən ibarət komandamız isə 8 xalla qrup mərhələsini lider kimi başa vuraraq final mərhələsinə yüksəliblər.

Şahmat üzrə fərdi yarışlarda Şəmkir rayon Kimya-biologiya təmayüllü liseyin müəllimi Bünyad Əsgərov I yeri tutub. O, həlledici qarşılaşmada Polşanın “ZNP” komandasının təmsilçisinə qalib gələrək yarışın qalibi olub.

Qeyd edək ki, Müəllimlərin Yay İdman Oyunları 2004-cü ildən etibarən ənənəvi olaraq hər il Bolqarıstanda keçirilir. Oyunlarda Ümummilli Lider Heydər Əliyevin anadan olmasının ildönümlərinə həsr edilən ölkədaxili idman yarışlarında yüksək nəticələr göstərərək münsiflər heyəti tərəfindən seçilən ittifaq üzvlərimiz iştirak edirlər.

Yarışlar avqustun 30-dək davam edəcək.

Bakı Dövlət Universitetinin nəzdində İqtisadiyyat və Humanitar kollecində Məzun Günü qeyd edilib.

Bakı Dövlət Universitetinin nəzdində İqtisadiyyat və Humanitar kollecində Məzun Günü böyük təntənə ilə qeyd olunmuşdur. Tədbir Azərbaycan Respublikasının Dövlət Himninin səsləndirilməsi və Vətənimizin ərazi bütövlüyü uğrunda canlarını fəda etmiş şəhidlərimizin əziz xatirəsinin bir dəqiqəlik sükutla yad edilməsi ilə başlamışdır. Tədbiri öz çıxışı ilə açan kollecin direktoru Hicran Əyyubova qonaqları və tədbir iştirakçılarını salamlamış, məzunları təbrik edərək onlara yeni nailiyyətlər arzulamışdır. Bakı Dövlət Universitetinin Sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev öz çıxışında hər bir məzunun gələcəyin savadlı mütəxəssisi, vicdanlı vətəndaşı və cəmiyyətə faydalı insanı olacağına inandığını bildirdi. Daha sonra dəvətli qonaqlar-YAP Abşeron Rayon Təşkilatının sədri Abbas Əliyev, Abşeron Rayon İcra Hakimiyyətinin başçısının müavini -Gülnar Rəhimova, kollecin şəhid məzunu Nicat Səmədovun atası Şahin Səmədov, kollecə əvvəlki dövrdə rəhbərlik etmiş və onun inkişafında böyük rolu olan Rüxsarə Əliyeva, uğurlu məzunlardan olmuş Kəmalə Qasımova da çıxış edərək, məzunları təbrik etmiş və onlara xoş arzularını bildirmişdirlər. Təhsil aldıqları müddətdə Ümumi Orta Müvəffəqiyyət Göstəriciləri yüksək olan,həmçinin kollecin ictimai işlərində fəal olan tələbələr Təşəkkürnamə ilə təltif olundular.Rəsmi hissənin sonunda ənənəvi məzun papaqlarının səmaya atılması mərasimə xüsusi rəng qatdı. Tədbirin bədii hissəsində məzunlar gənclər arasında populyar olan bir neçə musiqiçilərin ifasını dinləmiş və rəqs etmişdirlər. Məzunlarımızı bu əlamətdar gün münasibətilə səmimi qəlbdən təbrik edir, onlara sağlam, uğurlu və parlaq gələcək arzulayırıq.

BDU-nun nəzdində İqtisadiyyat və Humanitar Kollecin kollektivi Şəki şəhərinə səfər etmişdir.

BDU-nun nəzdində İqtisadiyyat və Humanitar Kollecin kollektivi 20 iyun tarixində Həmkarlar İttifaqı Komitəsinin dəstəyi ilə Şəki şəhərinə səfər etmişdir.

Səfər iştirakçıları Azərbaycan memarlığının gözəl nümunəsi olan Şəki Xan Sarayını, Diyarşünaslıq muzeyini ziyarət etmişdirlər. Səfər çərçivəsində Qafqazın ilk aqroturizm mərkəzi olan Bio Garden və füsunkar gözəlliyi olan Şəki yaylasına da səfər edilmişdir.

BDU-nun nəzdində İqtisadiyyat və Humanitar kollecin müəllimi İradə Xudiyeva təqaüdə yola salınmışdır.

BDU-nun nəzdində İqtisadiyyat və Humanitar kollecin müəllimi İradə Xudiyeva uzunmüddətli pedaqoji fəaliyyətini uğurla başa vuraraq təqaüdə yola salınmışdır. Kollecin direktoru Hicran Əyyubova və Həmkarlar İttifaqı Komitəsinin sədri Nisə Əliyeva kollektiv adından yubilyarı təbrik etmiş, ona təhsil sahəsində göstərdiyi nümunəvi fəaliyyətinə, kollecin inkişafına verdiyi töhfələrə və vicdanlı əməyinə görə təşəkkür etmiş, cansağlığı, həyatının yeni mərhələsində xoş günlər diləmişlər.

28 aprel Ümumdünya Əməyin Mühafizəsi Günü münasibətilə kollecdə maarifləndirici tədbir keçirilib.

28 aprel Ümumdünya Əməyin Mühafizəsi Günü münasibətilə kollecdə maarifləndirici tədbir keçirilib. Tədbirin əsas məqsədi əmək təhlükəsizliyi qaydalarının təbliği, sağlam və təhlükəsiz iş mühitinin əhəmiyyətinin çatdırılması olub. Tədbiri giriş sözü ilə açan kollecin Həmkarlar İttifaqı Komitəsinin sədri Nisə Əliyeva bu günün əhəmiyyətindən danışaraq qeyd ediblər ki, əməyin mühafizəsi yalnız iş yerlərində deyil, təhsil müəssisələrində də mühüm rol oynayır. Kollecin müəllimləri Tamilla Səttarova, Tutu Əhədova, Samirə Nuriyeva, Aytəkin Dəmirova mövzu ilə bağlı çıxış ediblər. Çıxışlarda müasir əmək münasibətlərində xüsusi əhəmiyyət kəsb edən psixososial iş mühiti, iş yerində stressin idarə edilməsi, sağlam ünsiyyət mühitinin yaradılması və kollektiv daxilində qarşılıqlı hörmətin qorunması məsələləri öz əksini tapıb. Tədbirin sonunda iştirakçılar arasında fikir mübadiləsi aparılıb, mövzu ilə bağlı suallar cavablandırılıb.

BDU-nun nəzdində İqtisadiyyat və Humanitar Kollecində 8 Mart Beynəlxalq Qadınlar Günü münasibətilə tədbir təşkil olunub.

BDU-nun nəzdində İqtisadiyyat və Humanitar Kollecində 8 Mart Beynəlxalq Qadınlar Günü münasibətilə təntənəli tədbir təşkil olunub. Tədbiri giriş sözü ilə açan kollecin direktoru Hicran xanım Əyyubova kollektivin xanım əməkdaşlarını təbrik edib və Azərbaycan qadınının tarix boyu cəmiyyətdə tutduğu yüksək mövqedən, xalqımızın milli-mənəvi dəyərlərinin qorunmasında və elmin inkişafında müstəsna xidmətlərindən danışıb. Direktor çıxışında ölkədə uğurla həyata keçirilən dövlət qadın siyasətindən danışaraq, qadınların cəmiyyətin müxtəlif sahələrində fəal iştirak etdiyini vurğulayıb, Azərbaycanın birinci xanımı Mehriban Əliyevanın ictimai-siyadi fəaliyyətinin Azərbaycan qadınının beynəlxalq səviyyədə müsbət imicinin formalaşmasına mühüm töhfə verdiyini qeyd edib. Daha sonra Kollecin Həmkarlar İttifaqının sədri Nisə Əliyeva çıxış edərək xanımları təbrik edib və kollecdə uzunmüddətli və nümunəvi fəaliyyətinə görə fərqlənən bir qrup xanım əməkdaşa Kollecin rəhbərliyi və Həmkarlar İttifaqının təşkilatçılığı ilə Təşəkkürnamə və gül dəstələri təqdim edilib. Tədbirin bədii hissəsində qonaq sənətkar- gənc və istedadlı xanəndə Fərman Məmmədov öz ifası ilə iştirakçılara xoş dəqiqələr yaşadıb.